માસુમ ચૌધરી (અરવલ્લી સમાચાર)
અમેરિકાના પૂર્વ રાષ્ટ્રપતિ ડોનાલ્ડ ટ્રમ્પે ઉપરાષ્ટ્રપતિ કમલા હેરિસની વંશીય ઓળખ પર સવાલ ઉઠાવ્યા છે. ટ્રમ્પે બુધવારે એક કાર્યક્રમમાં પૂછ્યું કે હેરિસ ભારતીય છે કે અશ્વેત.
ટ્રમ્પે કહ્યું કે કમલા હેરિસ હંમેશા પોતાની જાતને ભારત સાથે જોડાયેલી ગણાવતી હતી, પરંતુ થોડા વર્ષો પહેલા અચાનક તે અશ્વેત થઈ ગઈ. ટ્રમ્પે કહ્યું કે ઘણા વર્ષોથી તેમને ખબર ન હતી કે કમલા હેરિસ અશ્વેત છે, તેમને લાગતું હતું કે કમલા ભારતીય મૂળની છે. હવે કમલા પોતાને અશ્વેત કહે છે.
ટ્રમ્પે કહ્યું કે હવે કમલા વિશ્વમાં અશ્વેત તરીકે ઓળખાવા માગે છે, તેથી મને ખબર નથી કે તે ભારતીય છે કે અશ્વેત? ઠીક છે, હું બંનેને માન આપું છું, પરંતુ તે સ્પષ્ટ છે કે તેઓ મને માન આપતા નથી.
કમલાના પિતા જમૈકન હતા, જ્યારે તેમની માતા ભારતીય હતી. તે પોતાને ભારતીય અને અશ્વેત માને છે. કમલા હેરિસે પણ ટ્રમ્પના નિવેદન પર પ્રતિક્રિયા આપી છે.
કમલા હેરિસે કહ્યું- અપમાન કરવું એ ટ્રમ્પની આદત છે
ઉપરાષ્ટ્રપતિએ કહ્યું કે ટ્રમ્પની ભાષા નફરતભરી છે. કોઈનું અપમાન કરવું તેમની જૂની આદત છે. કમલાએ કહ્યું કે અમેરિકન લોકોને ટ્રમ્પ કરતાં વધુ સારા વ્યક્તિની જરૂર છે. તેમણે કહ્યું કે આપણને એવા વ્યક્તિની જરૂર છે જે જાતિના આધારે વિભાજનની રાજનીતિ ન કરે.
વ્હાઈટના પ્રેસ સેક્રેટરી પિયરે જીને કહ્યું – કોઈને એ કહેવાનો અધિકાર નથી કે કમલા કોણ છે અને તે કયા રૂપમાં પોતાની ઓળખ આપવા માગે છે. તેમણે કહ્યું- ટ્રમ્પે અશ્વેત કે ભારતીય વિશે પ્રશ્ન પૂછીને કમલાનું અપમાન કર્યું છે.
ટ્રમ્પે કહ્યું- અશ્વેતો માટે શ્રેષ્ઠ રાષ્ટ્રપતિ
ઇન્ટરવ્યુની શરૂઆતમાં એબીસી નેટવર્કના રિપોર્ટર રશેલ સ્કોટે ટ્રમ્પને પૂછ્યું કે શા માટે અશ્વેત લોકો તેમને મત આપશે. અશ્વેતો વિરુદ્ધ બોલવાનો તમારો લાંબો ઈતિહાસ છે. તેના પર તેમણે કહ્યું કે આ બધું ખોટું છે. અબ્રાહમ લિંકન પછી અશ્વેત લોકો માટે હું શ્રેષ્ઠ રાષ્ટ્રપતિ રહ્યો છું.
ટ્રમ્પે કહ્યું કે કમલાએ કાયદાનો અભ્યાસ કર્યો છે. આ સમયગાળા દરમિયાન તે એક વખત નિષ્ફળ પણ ગઈ હતી. આ હકીકત છે. કમલાએ વિચાર્યું ન હતું કે તે પરીક્ષા પાસ કરી શકશે. આ સિવાય ટ્રમ્પે 6 જુલાઈના રોજ 36 વર્ષની અશ્વેત મહિલા સોન્યા મેસીની હત્યા અંગેના સવાલનો પણ જવાબ આપ્યો હતો. તેમણે કહ્યું કે હું આ કેસ વિશે વધુ જાણતો નથી, પરંતુ જે પણ થયું તે ખૂબ જ ખરાબ હતું.
