70થી વધુ ગામોની 2 હજાર હેક્ટર જમીનને ફાયદો:માલપુરના વાત્રક ડેમની ડાબાકાંઠાની કેનાલમાં ખેડૂતોને ખેતી માટે ચોથા તબક્કાનું 180 ક્યુસેક પાણી છોડાયું

હાલ અરવલ્લી જિલ્લામાં ખેડૂતો દ્વારા રવિ સિઝનમાં ઘઉં, ચણા, બટાકા, ઘાસચારો, મકાઈનું વાવેતર કરાયું છે. સારી માવજત કરીને પાક લગભગ તૈયાર થવા આવ્યો છે ત્યારે ખેતીપાક માટે પાણી મુખ્ય સ્ત્રોત છે. ત્યારે સિંચાઈ વિભાગે ખેડૂતોને ખેતી માટે પાણી આપવાનું નક્કી કરેલું છે તે મુજબ માલપુરના વાત્રક ડેમમાંથી ત્રણ તબક્કા પુરા કરી આજે ચોથા તબક્કાનું પાણી વાત્રક ડાબા કાંઠાની કેનાલમાં છોડવા માં આવ્યું છે. આ પાણી છોડાતા બાયડ અને માલપુર તાલુકાની લગભગ બે હજાર હેક્ટર જમીનને સીંચાઇનો લાભ મળશે. બંને તાલુકાના 70થી વધુ ગામોની 2 હજાર હેક્ટર જમીનને પીયતનો લાભ મળશે. આમ આ વિસ્તારના ખેડૂતોમાં ખુશીની લહેર છવાઈ છે.