અરવલ્લી સમાચાર બ્યુરો
આણંદ, વલસાડ અને બનાસકાંઠામાં ભાજપના ઉમેદવાર નહીં બદલાય. ગુજરાતની વધુ 3 બેઠકો પર ઉમેદવારો બદલાવાની અટકળોનો આવ્યો અંત. ભાજપ માત્ર 2 બેઠકો પર જ નવા ઉમેદવાર ઉતારશે. વડોદરામાં રંજનબેન ભટ્ટના સ્થાને નવા ઉમેદવાર ઉતારશે ભાજપ તો સાબરકાંઠામાં ભીખાજી ઠાકોરના બદલે નવા ઉમેદવાર જાહેર થશે.
મિતેશ પટેલે ટ્વીટ કરીને પણ આ જાણકારી પોતાના મતદારોને આપી દીધી છે. એટલે કે આણંદમાં મિતેશ પટેલ સામે કોંગ્રેસના ઉમેદવાર અમિત ચાવડાની ટક્કર નક્કી છે. તો બનાસકાંઠામાં કોંગ્રેસનાં ઉમેદવાર ગેનીબેન ઠાકોર સામે ભાજપનાં રેખાબેન ચૌધરી જ ચૂંટણી લડશે. ઉમેદવાર બદલવાની વાત પર પૂર્ણ વિરામ લાગી ગયું છે.
એ જ રીતે વલસાડમાં કોંગ્રેસના ઉમેદવાર અનંત પટેલ સામે ભાજપના ઉમેદવાર ધવલ પટેલ જ ચૂંટણી લડશે. તો ગુજરાતમાં ભાજપના 4 ઉમેદવારોની જાહેરાત બાકી હતી તે 4 સીટ મહેસાણા, સુરેન્દ્રનગર, જૂનાગઢ અને અમરેલી ઉપરાંત હવે વડોદરા અને સાબરકાંઠામાં ઉમેદવાર જાહેર થશે.
